ဒီဇင်ဘာလ ၆ရက်၊ ၂၀၂၃
ရှမ်းပြည်မြောက်ပိုင်း ကျောက်မဲမြို့နယ် မိုင်းလုံဒေသဘက်မှာ စစ်ကောင်စီတပ်နှင့် PDF အပါအဝင် မြောက်ပိုင်းမဟာမိတ်တပ်တို့ တိုက်ပွဲပြင်းထန်စွာ ဖြစ်ပွားခဲ့ပြီး PDF ရဲဘော် ၁၃ ဦး သေဆုံးခဲ့ကြောင်း သတင်းရင်းမြစ်ထံမှ စုံစမ်းသိရှိ ရသည်။
ယမနေ့ ဒီဇင်ဘာလ ၅ ရက်နေ့ ညနေပိုင်း ၆ နာရီဝန်းကျင်တွင် ကျောက်မဲမြို့နယ် မိုင်းလုံအခြေစိုက် စစ်ကောင်စီတပ်အမှတ် ခလရ ၈၈ တပ်ကို PDF အပါအဝင် မြောက်ပိုင်းမဟာမိတ်တပ်တို့ တိုက်ခိုက် သိမ်းပိုက်နိုင်ခဲ့ပြီး လက်နက်တစ်ချို့ဖမ်းဆီးရမိကြောင်း သိရှိရသည်။
တိုက်ပွဲအတွင်း PDF ရဲဘော် ၁၃ ဦး သေဆုံးခဲ့ကြောင်း၊ စစ်ကောင်စီဘက်မှ ၂ ဦး သေဆုံးပြီး သေနတ် ၁၃ လက်၊ လက်နက်ခဲယမ်းအများအပြားကိုလည်း သိမ်းဆည်းရမိခဲ့ကြောင်း သိရသည်။
အဆိုပါ တိုက်ပွဲနှင့် နီးစပ်သော ကျေးရွာများတွင် ကျေးရွာအတွင်းသို့ အပြန်အလှန်ပစ်ခတ်သည့် နှစ်ဖက်လက်နက်ကြီး ကျရောက်ပေါက်ကွဲမှုကြောင့် အသက် ၃၅ နှစ်အရွယ် ကလေးမိခင်တစ်ဦး သေဆုံး ခဲ့ကြောင်း သိရသည်။
