သျှမ်းပြည်မြောက်ပိုင်း တန့်ယန်းမြို့ရှိ အသက် ၆၀ ကျော် အမျိုးသမီးတစ်ဦး မြေး နှင့် နေအိမ်တွင်းရှိနေစဥ် အမျိုးသား တစ်ဦး ဝင်လာပြီး ဓား နှင့် အချက်ပေါင်းများစွာဖြင့် ထိုးသတ်ခံရကြောင်း သတင်း သိရသည်။
ယမန်နေ့ အောက်တိုဘာ ၁၉ ရက် မွန်းလွဲ ၂ နာရီဝန်းကျင်တွင် တန့်ယန်းမြို့ အမှတ် ၆ ရပ်ကွက်တွင် နေထိုင်သည့် နိုင်းလွတ် အမည်ရှိ အသက် ၆၀ ကျော် အမျိုးသမီး သည် မြေးဖြစ်သူကို ပုခက်ထဲ ချော့သိပ်နေစဥ် ဓားဖြင့် ထိုးသတ်ခြင်း ခံလိုက်ရကြောင်း သတင်းသိရသည်။
“အိမ်မှာက သူ (နိုင်းလွတ်) နဲ့ သူ့မြေးလေး နှစ်ယောက်တည်းရှိနေတာပါ၊ နေ့ခင်း ၂ နာရီလောက်မှာ သူ့မြေးလေး ကို ပုခက်ထဲ ထည့်သိပ်နေတဲ့အချိန်မှာ ဘယ်ကနေ ရောက်လာမှန်းမသိတဲ့ အမျိုးသား တစ်ယောက်က ဓား နဲ့ နိုင်းလွတ် ကို ထိုးသတ်သွားတာ၊ ခန္ဓာကိုယ်မှာ ဓါးအချက်ပေါင်း ၂၉ ချက် တွေ့ရတယ်” ဟု အိမ်နီးချင်း အမျိုးသားတစ်ဦးက သျှမ်းသံတော်ဆင့် ကို ပြောသည်။
အခင်းဖြစ်ပွားသည့် အချိန်သည် နိုင်းလွတ်၏ သမီး နှင့် သားမက်တို့ တန့်ယန်းမြို့နယ် ကွန်လုံကျေးရွာသို့ စပါးရိတ်သိမ်းရန် ရောက်ရှိနေကြသဖြင့် အိမ်တွင် မြေးလေး နှင့် နိုင်းလွတ်တို့ နှစ်ဦးတည်းသာရှိနေသည့် အချိန် ဖြစ်ကြောင်း သိရသည်။
“မူးယစ်ဆေးကြောင်တဲ့ သူလည်းဖြစ်နိုင်တယ်။ နိုင်းလွတ်ကတော့ ဘယ်သူ့ကိုမှ ရန်ငြိုး ရန်စ မရှိဖူးဘူး။ ကလေး အော်ငိုလို့ အိမ်ဘေးက လူတွေ သွားကြည့်တာ။ သွားကြည့်တော့ အဲ့ဒီ အမျိုးသားက အိမ်နောက်ဖေးထဲ ပြေးသွားတာပဲ တွေ့လိုက်ရတယ်။ အဲ့ချိန် နိုင်းလွတ် က ဓားဒဏ်ရာ တွေနဲ့ သေဆုံးနေပြီ။ ကလေးတော့ ဘာမှ ထိခိုက်ဒဏ်ရာ မရရှိဘူး။ အိမ်ထဲက ပစ္စည်းတွေ ပျောက်တာတော့ မကြားရဘူး” ဟု အိမ်နီးချင်း အမျိုးသား တစ်ဦး ကပြောသည်။
နိုင်းလွတ်၏ ရုပ်အလောင်းကို သက်ဆိုင်ရာ တာဝန်ရှိသူများ နှင့် ရပ်ကွက်လူကြီးတို့မှ လာရောက်စစ်ဆေးပြီး ဆေးရုံသို့ ပို့ဆောင်ထားကြောင်း သိရသည်။
“မနေ့က ဖြစ်ပြီးပြီးချင်း ရဲတွေ၊ ရပ်ကွက်လူကြီးတွေက လာစစ်ဆေးကြပါတယ်၊ အလောင်းကိုတော့ ဆေးရုံကို ပို့ထားလိုက်ပြီ၊ ဆေးစစ်ချက်က ဒီနေ့ရလာရင် ဒီနေ့ မွန်းလွဲပိုင်းမှာပဲ သင်္ဂြိုလ်မယ်လို့ ကြားမိတယ်” ဟု အထက်ပါ ပုဂ္ဂိုလ်က ဆက်ပြောသည်။
ယခုလို ဖြစ်စဥ်သည် တန့်ယန်းမြို့နယ်အတွင်း ပထမဆုံး ဖြစ်ရပ်ဖြစ်ပြီး ဒေသခံ ပြည်သူများ စိုးရိမ်ကြောက်လန့် နေကြသဖြင့် တရားခံကို ဖမ်းဆီး အပြစ်ပေးစေလိုကြောင်း ဒေသခံများက ပြောသည်။ လက်ရှိချိန်ထိ ထို အမျိုးသားကို ဖမ်းဆီးရမိခဲ့ခြင်း မရှိသေးပေ။
စစ်ကောင်စီ မှ နိုင်ငံတော် အာဏာသိမ်းပြီး (၁) နှစ်ကျော် ကာလအတွင်း သျှမ်းပြည်တွင်း တရားဥပဒေ စိုးမိုးမှု ကင်းမဲ့လာပြီး သူခိုး ဓားပြ များပြားလာသည့်အတွက် ဒေသခံ ပြည်သူများ စိုးရိမ် ထိတ်လန့်နေကြသည်။
Crd:
