ရှမ်းပြည်နယ်တောင်ပိုင်း မိုင်းကိုင်မြို့နယ် ဝမ်ခမ်ကျေးရွာအုပ်စု ဖက်နှမ်ကျေးရွာ အနီးတွင် အခြေချလှုပ်ရှားလျက်ရှိသော ရှမ်းပြည်တိုးတက်ရေးပါတီ ရှမ်းပြည်တပ်မတော် (SSPP/SSA)မှ ဆိုင်ကယ်ခိုးယူသူ အမျိုးသား ( ၆ ) ဦးကို ကျေးသီး ပန်ကေတု လမ်းမ ပေါ်တွင် စစ်ဆေးဖမ်းဆီး ရရှိခဲ့တယ်လို့ ဒေသခံတစ်တွေစီကကြားသိရပါတယ်။
ဆိုင်ကယ်ခိုးယူသူများက အောက်တိုဘာ ၁ ရက်နေ့ တွင် ကျေးသီးမြို့အတွင်းမှ ( ၁ ) စီး ၊ အောက်တိုဘာ ၂ ရက်နေ့ မနက်အစောပိုင်းတွင် ကျေးသီးဆေးရုံအတွင်းမှ ( ၁ )စီး ၊ ထိုတစ်ရက်အတွင်း ရပ်ကွက်ထဲ ထပ်မံသွားရောက်ခိုးယူနေချိန် ဒေသခံများက ဝိုင်းဝန်းဖမ်းဆီးရာ ထွက်ပြေးလွတ်မြောက်သွားသောကြောင့် ကျေးသီးမြို့အတွင်းမှ တာဝန်ရှိသူများ နှင့် ဒေသခံများက ရှမ်းပြည်တိုးတက်ရေးပါတီ ရှမ်းပြည်တပ်မတော် (SSPP/SSA)ကို အကူအညီ တောင်းဆိုမှုဖြင့် ကျေးသီးမှ ပန်ကေတု လမ်းမပေါ်ရှိ ဝမ်ခမ်ကျေးရွာအုပ်စု နှင့် ဟမ်းငိုင်းကျေးရွာအုပ်စု ကြားတွင် (SSPP/SSA) ဘက်မှ စောင့်ကြည့် စစ်ဆေးမှုများပြုလုပ်ကာ မနက် ၀၉ : ၃၀ အချိန်ခန့်တွင် ပစ်မှုကျုးလွန်သူ အမျိုးသား ( ၆ ) ဦးကို ဖမ်းဆီးထိန်းသိမ်းနိုင်ခဲ့တယ်လို့ ကြားသိရပါတယ်။
ဖမ်းဆီးထိန်းသိမ်းရရှိခဲ့သော အမျိုးသား ( ၆ ) ဦး – ၁. မောင်အေး ( အသက် 22 ၊ လူမျိုး ရှမ်း တအောင်း ၊ နေရပ် နမ္မတူမြို့နယ် နမ့်တောင်ကုန်းကျေးရွာအုပ်စု နားကျိုင်းကျေးရွာ ) ၊ ၂. ချစ်ဦးမောင် ( အသက် 20 ၊ လူမျိုး တအောင်း ၊ နေရပ် ရှမ်းပြည်နယ်မြောက်ပိုင်း နမ့်ဆန်မြို့နယ် ဝမ်လန်းကျေးရွာ ) ၊ ၃. ရန်နိုင်ဦး ( အသက် 22 ) ၊ ၄. အိုက်အောင် ( အသက် 21 ၊ လူမျိုး တအောင်းလူမျိုး ၊ နေရပ် ရှမ်းပြည်နယ်မြောက်ပိုင်း နမ့်ဆန်မြို့နယ် ပင်တောင်းကျေးရွာ ) ၊ ၅. သန်းလူ ( အသက် 22 ၊ လူမျိုး တအောင်း ၊ နေရပ် ရှမ်းပြည်နယ်မြောက်ပိုင်း နမ့်ဆန်မြို့နယ် အောက်ဝမ်ငိုင်းကျေးရွာ ) ၊ ၆. အိုက်ဒွေး ( အသက် 20 ၊ လူမျိုး တအောင်း ၊ နေရပ် ရှမ်းပြည်နယ်မြောက်ပိုင်း နမ္မတူမြို့နယ် မန်စံကျေးရွာ )။
(SSPP/SSA) မှ ဖမ်းဆီးထိန်းသိမ်းရရှိထားသော ပစ်မှုကျုးလွန်သူ အမျိုးသား ( ၆ ) ဦးဟာ နမ္မတူမြို့နယ် မန်စံ ကျေးရွာအုပ်စုထဲမှာလဲ ဆိုင်ကယ်ခိုးခဲ့တာ များပြီလို့ နမ္မတူမြို့နယ် မန်စံကျေးရွာဒေသခံတွေက ပြောပါတယ်။
ပစ်မှူ့ကျုးလွန်သူ (၆) ဦးအား SSPP/SSA မှ ကျေးသီးမြို့ရှိ သက်ဆိုင်ရာ တာဝန်ရှိသူ နှင့် ရပ်မိရပ်ဖ များထံသို့ လွဲပြောင်းအပ်နှံပေးခဲ့ပြီလို့သိရပါတယ်။
